तुलबहादुर कवँर मगर
मसुरिया, १७ मंसिर ।
दाङको राप्ती गाउँपालिकाले फोहोरमैला व्यवस्थापनको समस्या समाधान गर्न ७ सदस्यीय समिति गठन गरेको छ। मंगलबार बसेको गाउँकार्यपालिका बैठकले उपाध्यक्ष कमलापति चौधरीको संयोजकत्वमा समिति बनाएर ३० दिनभित्र आवश्यक व्यवस्था मिलाउने जिम्मेवारी दिएको हो।
समितिमा वडा नं. १ का अध्यक्ष गेमे खड्का, वडा नं. २ का अध्यक्ष पहलवान चौधरी, वडा नं. ३ का अध्यक्ष उमेश अधिकारी, वडा नं. ४ का अध्यक्ष विरबहादुर चौधरी, कार्यपालिका सदस्य सावित्री चौधरी, इन्जिनियर अशोक बेल्वासे र खानेपानी तथा सरसफाइ शाखा प्रमुख गीता चौधरी सदस्य सचिवका रूपमा रहनु भएको छ।
समितिले पहिल्यै थुप्रिएको फोहोरको परिमाण पत्ता लगाई सुरक्षित र दिगो व्यवस्थापन गर्ने योजना बनाउनेछ। स्थानीयसँग निरन्तर समन्वय गर्दै सरसफाइ केन्द्रमा देखिएका समस्या समाधान गर्ने, कुहिने–नकुहिने फोहोर छुट्याउने तथा प्रशोधन र सुरक्षित विसर्जनका उपाय लागू गर्ने जिम्मा समितिलाई दिइएको छ।
सरसफाइकर्मीले पञ्जा, मास्क, बुटलगायत सुरक्षा सामग्री अनिवार्य रूपमा प्रयोग हुने वातावरण बनाउने, केन्द्रको नियमित सञ्चालन तथा मर्मत–सम्भारमा ध्यान दिने कार्य पनि समितिले गर्नेछ।
फोहोरबाट तयार हुने कम्पोस्ट मल र पुनःप्रयोग योग्य सामग्रीलाई बजारसम्म पुर्याउने, लागत–प्रभावी उपाय अपनाई स्रोत परिचालन गर्ने तथा नयाँ प्रविधि र उपकरणबारे सिफारिस गर्ने अधिकारसमेत समितिलाई दिइएको छ।
समितिले आफ्नो कार्यप्रगति गाउँपालिकालाई नियमित रूपमा जानकारी गराउँदै जानेछ। गाउँपालिकाले यो समितिलाई दिगो फोहोर व्यवस्थापनतर्फको महत्वपूर्ण कदमका रूपमा लिएको छ।
लाइभदाङ । १८ मंसिर २०८२, बुधबार २२:२९ बजे