बेइजिङ : भारतसँगको विवादित सीमाक्षेत्र लद्दाखमा गोली प्रहार भएको घटनाको दोष चीनले भारतीय सेनालाई लगाएको छ ।
भारतीय सेनाले चीनलाई गोली प्रहार गरेको आरोप लगाएपछि चीन सरकारले विज्ञप्ति निकालेर उक्त आरोप अस्वीकार गरेको हो । साथै भारतीय सेनाले नै पहिले सिमानाबाट गोली चलाएको चिनियाँ अधिकारीले जनाए ।
चीनको विदेश मन्त्रालयले वास्तविक नियन्त्रण रेखामा सोमबार भारतीय सेनाले नै पहिले गोली चलाएको दावी गरेको हो । दुई देशका सैनिक कमाण्डरबीच वार्ता भइरहँदा भारतीय सेनाले चुनौतीस्वरुप गोली चलाएको चिनियाँ अधिकारीको आरोप छ ।
चिनियाँ विदेश मन्त्रालयका प्रवक्ता झाओ लिजियानले नियमित प्रेस ब्रिफिङको क्रममा एलएसीमा भारतीय सैनिकहरुले चेतावनी दिनका लागि गोली चलाएको बताइन् । कमाण्डर तहमा कुराकानी भइरहँदा भारतीय सेनाले गोली चलाएको चिनियाँ दावी छ ।
चिनियाँ प्रवक्ताका अनुसार १९७५ पछि (४५ वर्षपछि) चीन र भारतको सीमाक्षेत्रमा पहिलो पटक गोली चलेको हो । तर चीनले दुई देशबीच मतभेदलाई शान्तिपूर्ण रुपमा कसटनीतिक तथा सैन्य वार्ताको माध्यमबाट समाधान गरिनुपर्ने बताएको छ ।
भारतीय सेनाले भने यसअघि नै लद्दाखमा सोमबार भएको गोलीबारी चिनियाँ सेनाले पहिले गरेको दावी गरेको थियो । चिनियाँ सेनाले सीमाबाट पहिले भारततर्फ हवाइ फायरिङ गरेको भारतीय सेनाको दावी छ । आफूहरु संयम भएर बसिरहँदा चिनियाँ सेनाले उत्तेजित बनाउने वातावरण सिर्जना गरेको भारतीय सेनाको आरोप छ ।
यसअघि पटक पटक दुई देशका सेनाबीच झडप र निशस्त्र भीडन्त भए पनि सिमानाबाट गोली चलाइएको ४५ वर्षपछि यो पहिलो घटना हो । दुबै देशका सेनाले आपसमा आरोप प्रत्यारोप लगाएकाले कुन देशका सेनाले गोली चलाउन सुरु गरेको भन्ने बारे विस्तृतमा सार्वजनिक भएको छैन ।
