सामाजिक अभियान्ता एवम् नेपाली काँग्रेस जिल्ला कार्यसमिति दाङका सदस्य  विरबहादुर खत्री (विरु)  संग समसामायिक  विषयमा  केन्द्रित रहेर पत्रकार अनिल अधिकारीले गरेका कुराकानी सारसंक्षेपमा ………….

स्वागत छ यहाँलाई !
धन्यवाद !
सन्चै हुनुहुन्छ ! आजभोली के मा व्यस्त हुनुहुन्छ ?
सन्चै छु हजुर !
सामाजिक कार्यमा मेरो व्यस्तता रहेको छ । समाजलाई गर्नुपर्ने योगदान गर्दै आएको छु । पारिवारिक जिम्मेवारीमा पनि मेरो व्यस्तता रहने गर्छ ।सामाजिक अभियान्ताको रुपमा क्रियाशिल रहदा कस्तो अनुभूति गर्नु भएको छ ?
निस्वार्थ भावले सामाजिक काम गर्दा आत्म सन्तुष्टि मिलेको छ । घरपरिवारको माया, अग्रजको आर्शिवाद र साथीभाईको हौसलाले सामाजिक कार्यमा अझ बढी लाग्ने प्रेरणा मिलेको छ । मन सन्तुष्ट र आनन्दित भएको छ ।

समाजमा सामाजिक उत्तरदायित्वका काम भन्दा पनि होहल्ला र होडवाजी चलेको देखिन्छ यसका पछाडी के कारण हुन सक्छ ?
हामीले भोगेको देखेको समाज भन्दा अहिलेको समाज भिन्नै छ । हिजोको दिनहरुमा माया सद्भाव देखिन्थ्यो भने एक आपसमा प्रेमील सम्बन्ध रहने गथ्र्यो । त्यसले सामाजिक एकता कायम गदथ्र्यो । अहिलेको समाजमा तछाड मछाड मात्र देखिन्छ । एक आपसमा होडवाजी देखिन्छ । यसले समाजलाई एकतावद्ध नबनाई विखण्डण तर्फ लगिरहेको छ यो सबैको चासोको विषय बन्न सक्नुपर्छ । सामजलाई केही योगदान गरौं भन्दा पनि आफु केन्द्रित काम गर्दा समाजमा होडवाजी देखिएको हो भन्ने मेरो बुझाई हो ।

समाज विग्रनुमा सबै भन्दा बढी दोषी कसलाई मान्नु हुन्छ ?
माया, सद्भाव र एकता नभएकै कारण समाज बिग्रिरहेको छ । यसै समाजमा म पनि एक किसिमको दोषी नै हुँ । समाजमा अगुवाहरुको अग्रणी भूमिका रहन्छ  । समाजलाई सही बाटो तिर हिडाउनु नै असल अगुवाको कर्तव्य हो । एउटा समाजलाई के कति योगदान गर्न सकिन्छ र त्यस समाजलाई कसरी सुन्दर समाज बनाउन सकिन्छ भन्ने विषयमा अध्ययन नै नगरी मनपरी ढंगले काम गर्दा एउटा अगुवा कै कारण सिंगो समाज विग्रन पुग्छ । यस विषयमा सामाजिक क्षेत्रमा लागेका अगुवाहरुले ध्यान दिनु पर्छ जस्तो मलाई लाग्छ ।

राजनीति विशुद्ध सेवा हुनुपर्नेमा व्यापार जस्तो भयो भन्ने जन गुनासो छ, यसमा तपाईको भनाई के छ ?
राजनीति विशुद्ध सेवा नै हो तर पछिल्लो घटनाक्रमलाई हेर्दै जाने हो भने राजनीति प्रति आम नागरिकको असन्तुष्टि रहेको छ । राजनीति भित्र नातावाद, क्रिपावाद र अवसरवाद मौलाई रहेको छ । जनचाहना विपरित काम हुदै आएका छन् । अराजनीतिक व्यक्तिहरुको हालीमुहाली राजनीतिमा दिनानुदिन बढ्दो छ । यी यस्ता कुराहरुले राजनीतिलाई बदनाम गराईरहेको महशुस मैले गरेको छु ।

जनता राजनीतिक दलबाट वाक्क दिक्क देखिन्छन्, यसका पछाडी के कारण हुन सक्छन् ?
राजनीतिक दलबाट जुन अपेक्षा आम नागरिकले गरेका थिए सो अनुरुप काम हुन नसकेपछि दलहरु प्रति जनताको गुनासो बढ्दै गएको साँचो हो । कुशासन, भ्रष्टाचार दिन प्रतिदिन मौलाई रहेको छ, वेरोजगारको संख्या बढिरहेको छ, युवापंतिले देश छोड्ने क्रम जारी छ । दल र सरकारले जनचाहना अनुरुप काम गर्न सकि रहेको छैन । यस्तो अवस्थामा जनता वाक्क दिक्क हुनेनै भए । विचौलिया, अराजनीतिक र असामाजिक व्यक्तिहरुको हालिमुहाली राजनीतिक दल भित्र बढेका कारणले पनि जनता वाक्क दिक्क भएका हुन भन्ने मेरो बुझाई हो ।

राजनीतिक दलका नेतृत्व तहले कार्यकर्तालाई प्रोत्साहन गर्नुको साटो हतोत्साहित गरिरहेका छन् भन्ने गुनासोको विषयमा तपाईको भनाई के छ ?
एउटा राजनीतिक दल निर्माण गर्न ठूलो संघर्ष गर्नुपर्छ । हजारांै लाखौं कार्यकर्ताहरुको रगत पसिनाले एउटा राजनीतिक दलको जन्म भएको हुन्छ तर तिनै कार्यकर्तालई नेतृत्व तहले हतोत्साहित गरेकै कारण दल र नेतृत्व प्रति कार्यकताहरुले टिका टिप्पणी गर्न थालेका छन् । यस विषयमा नेतृत्व तहले गम्भीर भएर सोच्नु पर्ने बेला आएको छ र दलका नेतृत्व तह सुध्रिनुको विकल्प नरहेको मेरो बुझाई हो  ।

तपाईका सुभेच्छुकलाई केही भन्नु छ?
म भन्दा पनि हामी भन्ने परिपाटीको विकास गरौं । सामाजिक काममा हातेमालो गर्दै अघि बढौं । सकारात्मक सोचका साथ अघि बढियो भने अवश्य गन्तव्यमा पुग्न सकिन्छ भन्ने मेरो बुझाई हो । सामाजिक कार्यका लागि एकतावद्ध हुन म मेरा शुभेच्छुकलाई हार्दिक अनुरोध गर्दछु ।

अन्त्यमा ……………..?
मलाई समसामयिक विषयमा आफ्ना भनाईहरु राख्ने सुअवसर दिनु भएकोमा तपाई लगायत लाइभदाङ टिमलाई धन्यवाद ।