सुर्खेत, १७ जेठ ।
सुर्खेतमा जिप दुर्घटना हुँदा चार जनाको मृत्यु भएको छ।
गएराति सुर्खेतबाट कालीकोट जाँदै गरेको भे १ च २५६० नम्बरको जिप सुर्खेतको विरेन्द्रनगर नरपालिका–१३ रातानाङ्ग्लानजिक टाकुरी मोडबाट खसेर दुर्घटना भएको हो।
जिल्ला प्रहरी कार्यालय सुर्खेतका डिएसपी विरेन्द्रवीर विश्वकर्माका अनुसार दुर्घटना भएको सूचना प्रहरीले बिहीबार बिहान सवा २ बजे प्राप्त गरेको थियो।
त्यसपछि प्रहरी दुर्घटनास्थल पुगेको उनले बताए। उनका अनुसार जिप अन्दाजी ४ सय मिटर तल खसेको छ।
दुई जनाको शव बिहानै निकालिएको छ भने दुई जनाको शव भीरमै रहेको र निकाल्ने प्रयास जारी रहेको डिएसपी विश्वकर्माले जानकारी दिए। मृतकको सनाखत भइसकेको छैन।
प्रहरीले दुई जनालाई घाइते अवस्थामा उद्धार गरी अस्पताल पुर्याएको छ। घाइतेहरूमा कालीकोटको शुभकालिका गाउँपालिका–३ का अन्दाजी २८/२९ वर्षका नरी कामी र खाडाच्कर नगरपालिका ९ पाखाका नरेन्द्र विष्ट छन्।
उनीहरूको कर्णाली प्रदेश अस्पतालमा उपचार भइरहेको डिएसपी विश्वकर्माले जानकारी दिए।
लाइभदाङ । १७ जेष्ठ २०८१, बिहीबार ०८:१० बजे