बैशाख ३० गते स्थानीय तहको निर्वाचन घोषणा भएको छ । त्यही अनुसार निर्वाचन आयोगले आफ्नो तयारी अघि बढाएको छ । राजनीतिक दलहरुले पनि चुनाब केन्द्रित गतिबिधि गरिरहेका छन् । निर्वाचन आउन २ महिना बाँकी रहदै गर्दा राजनीतिक दलहरु गाउँ केन्द्रित बनेका छन् । गाउँ–गाउँमा हुने चुनाबी सभाहरुमा सक्रिय हुने गरेका छन् । विगतका चुनाब पाईला समेत नटेकेका स्थानमा पनि जनप्रतिनिधिहरु पुग्न थालेका छन् । आर्थिक, राजनीतिक, सामाजिक हिसाबले पिछडिएको समुदायमा पुगेर आर्थिक लाभदेखि बिभिन्न आस्वासन दिन थालिएको छ । चुनाब एजेण्डाले भन्दा पनि तिकडम गरेर जित्ने प्रबृति छ । साम, दाम,दण्ड, भेद प्रयोग गरेर भएपनि चुनाब आफ्नो पोल्टामा ल्याउनु पर्छ, भन्ने बुझाई छ । त्यसैले पनि सोझा, साझा जनतालाई भ्रम पार्ने काम भइरहेको छ ।
त्यसकै एउटा उदाहरण अहिलेको पार्टी प्रवेशलाई लिन सकिन्छ । टोल विकास संस्था गठन गर्ने भनेर पार्टीको कमिटि गठन गर्ने, कुलो निर्माणकालागि समिति गठन गर्ने बाहाना बनाउने र पार्टीका कमिटी गठन गर्ने सम्मका हर्कतहरु पार्टीबाट हुने गरेका छन् । सोझो एउटै ब्यक्तीलाई एउटा पार्टीमा प्रवेश गराउने, त्यही ब्यक्ती भोलिपल्ट अर्कै पार्टीमा प्रवेश गराउने क्रम पनि बढिरहेको छ । ब्यक्तीलाई बिभिन्न प्रलोभनमा पार्ने अनि पार्टी प्रवेश गराउने खालका गतिबिधि भइरहेका छन् । जो राजनीतिमा देखिएको बिकृति हो । आफ्ना विचार, एजेण्डा जनतामा लिने र जनताले त्यसलाई मन पराएर समर्थन वा विरोध गर्नु एउटा कुरा होला, तर, नागरिक जति शिक्षित हुँदैछन्, उति नै बिकृत रुपमा देखा पर्दैछ । यसमा जनता पनि चनाखो हुनुपर्ने देखिन्छ । जनता आफैपनि कसैले प्रलोभनमा पार्दैमा त्यसको प्रभाबमा परिहाल्ने, जसले जे भन्छ, त्यसका पछि दौडिने गर्नुहुँदैन । यसले हाम्रो अमूल्य मत गलत ठाउँमा प्रयोग भइरहेको हुन्छ । जसले हामीलाई प्रलोभनमा पार्छ, त्यसले राज्यको सम्पतिमा ब्रमलुट मच्चाउछ । त्यसैले हामी पनि सचेत हुन आबश्यक छ ।
यो ५ बर्षमा जनप्रतिनिधिका जस्ता हर्कतहरु देखिए । जनता यस्तै कुराहरुको पछि लाग्दा देखिएका परिणामहरु हुन् । त्यसैले अबपछि क्षणिक लोभलालजको पछि लाग्दा हामीलाई नै नोक्सान हुन्छ । मुलुकलाई कता लैजाने भन्ने कुरा जनताकै हातमा हुन्छ । त्यसैले कसैको लोभलालजमा नपरौं । सक्षम नागरिकको परिचय दिदै सक्षम उम्मेदवार स्वविवेकले प्रयोग गरौं । त्यसले नै समृद्धिको चित्र कोर्ने छ ।साभारः अग्रिम साप्ताहिक
लाइभदाङ । १० चैत्र २०७८, बिहीबार १०:३४ बजे