सुर्खेत, १५ कात्तिक ।
गन्तव्य कुरिएर सर्भिस प्रालिले कर्णाली प्रदेशको राजधानी वीरेन्द्रनगर सुर्खेतमा आफ्नो नयाँ शाखा सञ्चालनमा ल्याएको छ। राष्ट्रिय तथा अन्तर्राष्ट्रिय कुरिएर र कार्गो सेवालाई थप विस्तार गर्दै सेवाग्राहीलाई घरदैलोमै सेवा उपलब्ध गराउने लक्ष्यसहित कम्पनीले सुर्खेतमा शाखा स्थापना गरेको हो।

वीरेन्द्रनगर नगरपालिका–१०, बसपार्क सुर्खेतमा रहेको नयाँ शाखाको उद्घाटन गन्तव्य कुरिएर सर्भिस प्रालिका निर्देशक तिलक केसीले आइतबार गरेका हुन्। शाखा सञ्चालनमा आएसँगै सुर्खेत तथा आसपासका क्षेत्रका सेवाग्राहीलाई स्वदेश तथा विदेशमा कागजात, पार्सल र अन्य सामान पठाउन थप सहज हुने कम्पनीले अपेक्षा गरेको छ।

शाखाको उद्घाटन गर्दै निर्देशक केसीले गन्तव्य कुरिएरले ग्राहकलाई भरपर्दो, छिटो र सहज सेवा उपलब्ध गराउने उद्देश्यका साथ आफ्नो सेवा सञ्जाल विस्तार गरिरहेको बताए।

उनले भने, “हाम्रो मुख्य उद्देश्य ग्राहकले कुरिएर सेवा लिनकै लागि अनावश्यक झन्झट बेहोर्नु नपरोस् भन्ने हो। सुर्खेतमा शाखा विस्तार गर्नुको उद्देश्य यहाँका नागरिक तथा व्यवसायीलाई राष्ट्रिय र अन्तर्राष्ट्रिय कुरिएर एवं कार्गो सेवा सहज रूपमा उपलब्ध गराउनु हो। आगामी दिनमा घरदैलोमै सेवा पुर्‍याउँदै ग्राहकको विश्वास जित्ने हाम्रो लक्ष्य छ।”

केसीका अनुसार गन्तव्य कुरिएरले सेवा विस्तारसँगै सेवाको गुणस्तर, विश्वसनीयता र ग्राहक सन्तुष्टिलाई प्राथमिकतामा राखेर काम गर्नेछ। देशका विभिन्न स्थानमा शाखा विस्तार गर्दै सेवाग्राहीको पहुँच बढाउने कम्पनीको योजना रहेको उनले बताए।

त्यसैगरी, गन्तव्य कुरिएर सर्भिस सुर्खेत शाखाका प्रबन्धक रमेश लामिछानेले स्थानीय सेवाग्राहीलाई सहज, छरितो र भरपर्दो सेवा उपलब्ध गराउन शाखाले विशेष ध्यान दिने बताए।

लामिछानेले भने, “सुर्खेत तथा आसपासका क्षेत्रका नागरिक, व्यवसायी र विदेशमा रहेका आफन्तलाई सामान पठाउन चाहने सेवाग्राहीका लागि हामी सहज माध्यम बन्न चाहन्छौँ। ग्राहकको आवश्यकतालाई बुझेर छिटो, सुरक्षित र विश्वसनीय सेवा प्रदान गर्नु हाम्रो प्राथमिकता हुनेछ। सम्भव भएसम्म घरबाटै सामान संकलन गर्ने व्यवस्था मिलाएर सेवाग्राहीलाई थप सुविधा दिने हाम्रो लक्ष्य छ।”

उनका अनुसार शाखाले स्थानीय स्तरमा कुरिएर सेवाको पहुँच विस्तार गर्नुका साथै व्यापारिक तथा व्यक्तिगत प्रयोजनका सामान ओसारपसारमा सहजीकरण गर्नेछ।

गन्तव्य कुरिएरले नेपालबाट जापान, दक्षिण कोरिया, अमेरिका, क्यानडा, अस्ट्रेलिया, बेलायत, युरोप, खाडी मुलुक लगायत विभिन्न देशमा अन्तर्राष्ट्रिय कुरिएर तथा कार्गो सेवा प्रदान गर्दै आएको छ। नयाँ शाखामार्फत सुर्खेत क्षेत्रका सेवाग्राहीलाई पनि यस्ता सेवामा सहज पहुँच उपलब्ध गराउने अपेक्षा गरिएको छ।

सुर्खेतमा शाखा विस्तार भएसँगै कर्णाली प्रदेशका नागरिकले कुरिएर तथा कार्गो सेवाका लागि थप विकल्प पाउनेछन्। स्थानीय आवश्यकतालाई प्राथमिकतामा राख्दै सेवा विस्तार गर्ने कम्पनीको योजनाले व्यक्तिगत तथा व्यावसायिक प्रयोजनका सामान पठाउन चाहने सेवाग्राहीलाई सहयोग पुग्ने विश्वास गरिएको छ।