दाङ, १५ वैशाख ।
लागुऔषध नियन्त्रण तथा रोकथाम अभियानलाई थप सुदृढ बनाउने उद्देश्यले जिल्ला प्रहरी कार्यालय दाङले सञ्चालन गरेको पाँच दिने विशेष “स्विप अपरेशन” मा १६२ जनालाई नियन्त्रणमा लिइएको छ। वैशाख ९ गतेदेखि १३ गतेसम्म सञ्चालन गरिएको उक्त अभियानमा प्रहरीले लागुऔषध प्रयोग तथा सम्बन्धित आपराधिक गतिविधिमा संलग्न रहेको आशंकामा ठूलो संख्यामा व्यक्तिहरूलाई नियन्त्रणमा लिएको हो।

प्रहरीका अनुसार नियन्त्रणमा लिइएकामध्ये २३ जना महिला र १३९ जना पुरुष रहेका छन्। तीमध्ये २१ जनाविरुद्ध विभिन्न मुद्दा दर्ता गरी कानुनी प्रक्रिया अघि बढाइएको छ। यसअन्तर्गत १५ जनाविरुद्ध लागुऔषधसम्बन्धी मुद्दा चलाइएको छ भने १ जनाविरुद्ध चोरी र ५ जनाविरुद्ध अभद्र व्यवहारसम्बन्धी मुद्दा दर्ता गरिएको छ।

अन्य १४१ जनामाथि भने परिस्थिति र संलग्नताको आधारमा फरक–फरक प्रकारका कारबाही गरिएको प्रहरीले जनाएको छ। तीमध्ये २ जनालाई पुनर्स्थापना केन्द्र पठाइएको छ, जसलाई लागुऔषध दुव्र्यसनबाट मुक्त गराउने उद्देश्य राखिएको छ। यसैगरी, पाँच जना फरार प्रतिवादीलाई पक्राउ गरी फैसला कार्यान्वयन गरिएको छ। उनीहरूलाई अदालतको निर्णयअनुसार कुल १ वर्ष ३ महिना कैद सजाय र ३ हजार ५०० रुपैयाँ जरिवाना कार्यान्वयन गरिएको प्रहरीले जनाएको छ।

अभियानका क्रममा नियन्त्रणमा लिइएका १३४ जनालाई भने सम्झाइ–बुझाइ गरी अभिभावकको जिम्मा लगाइएको छ। प्रहरीका अनुसार उनीहरूलाई पहिलो चरणमा चेतावनीसहित सुधारको अवसर दिइएको हो। यसलाई दण्डात्मक भन्दा पनि सुधारात्मक दृष्टिकोणअन्तर्गत गरिएको कदमका रूपमा व्याख्या गरिएको छ।

स्विप अपरेशनकै क्रममा प्रहरीले कुल ४० ग्राम ५५० मिलिग्राम ब्राउन सुगर ९लागुऔषध० बरामद गरेको छ। बरामद गरिएको लागुऔषधलाई आवश्यक परीक्षण तथा कानुनी प्रक्रियाका लागि सम्बन्धित निकायमा पठाइएको छ। प्रहरीले बरामद परिमाण सानो देखिए पनि यसको वितरण सञ्जाल र प्रयोगको प्रभाव गम्भीर हुने भएकाले नियन्त्रण अभियानलाई निरन्तरता दिन आवश्यक रहेको जनाएको छ।

जिल्ला प्रहरी कार्यालय दाङका अनुसार पछिल्लो समय लागुऔषध प्रयोग तथा कारोबारका घटनाहरू बढ्दै गएको सन्दर्भमा यस्तो लक्षित अपरेशन सञ्चालन गरिएको हो। विशेषगरी युवापुस्तामा लागुऔषध दुव्र्यसनको जोखिम बढ्दै गएको भन्दै प्रहरी सतर्कता बढाइएको बताइएको छ।

प्रहरीले यस्ता अपरेशनहरूले न केवल अपराध नियन्त्रणमा सहयोग पुर्‍याउने, तर समाजमा सचेतना अभिवृद्धि गर्न पनि महत्वपूर्ण भूमिका खेल्ने जनाएको छ। नियन्त्रणमा परेका व्यक्तिहरूमध्ये धेरैलाई सुधारको अवसर प्रदान गर्नुले दीर्घकालीन रूपमा दुव्र्यसन न्यूनीकरणमा सकारात्मक प्रभाव पार्ने अपेक्षा गरिएको छ।

प्रहरीले आगामी दिनमा पनि यस्ता स्विप अपरेशनलाई निरन्तरता दिने स्पष्ट पारेको छ। लागुऔषधमुक्त समाज निर्माणका लागि सरकारी निकाय, स्थानीय तह, शैक्षिक संस्था, अभिभावक तथा नागरिक समाजबीच समन्वय र सहकार्य अपरिहार्य रहेको प्रहरीको भनाइ छ।

जिल्ला प्रहरी कार्यालय दाङले यस अभियानलाई सफल बनाउन सहयोग पुर्‍याउने सम्पूर्ण सरोकारवाला निकाय तथा आम समुदायप्रति आभार व्यक्त गर्दै आगामी दिनमा पनि सक्रिय सहयोगका लागि आग्रह गरेको छ। साथै, कुनै पनि शंकास्पद गतिविधिबारे नजिकको प्रहरी कार्यालयमा जानकारी गराउन पनि नागरिकलाई अपिल गरिएको छ।

प्रहरीका अनुसार लागुऔषध दुव्र्यसन न्यूनीकरण केवल कानुनी कारबाहीबाट मात्र सम्भव नहुने भएकाले रोकथाम, उपचार र पुनर्स्थापनालाई समानान्तर रूपमा अघि बढाउनुपर्ने आवश्यकता औंल्याइएको छ। यसका लागि समुदायस्तरमा सचेतनामूलक कार्यक्रम, विद्यालयस्तरमा शिक्षा र परिवारको निगरानीलाई प्रभावकारी बनाउनु जरुरी रहेको उल्लेख गरिएको छ।