काठमाण्डौ, ९ साउन ।
भारतको राजधानी नयाँ दिल्लीस्थित अन्तर्राष्ट्रिय विमानस्थलबाट भिजिट भिसामा कुवेत जान लागेका ४७ जना नेपाली महिलाहरूलाई नेपाल फर्काइएको छ। एनओसी (अनिवार्य अनुमति पत्र) बिना नै कुवेत जान लागेका ती महिलाहरूलाई नेपाली दूतावासको समन्वयमा स्थलमार्ग प्रयोग गरी बिहिबार राति सुनौली नाका हुँदै रूपन्देही ल्याइएको हो।
रूपन्देहीका प्रमुख जिल्ला अधिकारी वासुदेव घिमिरेका अनुसार महिलाहरूलाई प्रशासनको जिम्मा दिइएको छ र उनीहरूलाई काठमाण्डौ ल्याउने प्रक्रिया अघि बढाइएको छ। वैदेशिक रोजगारीको नाममा भइरहेको अवैध गतिविधिका कारण उनीहरूलाई फर्काइएको जनाइएको छ।
घटनालाई गम्भीर रूपमा लिँदै गृहमन्त्री रमेश लेखकले प्रहरीले छानबिन गर्न निर्देशन दिनुभएको छ। गृह मन्त्रालयका अनुसार गृहमन्त्रीले मानव बेचबिखन अनुसन्धान ब्युरोलाई घटनाबारे आवश्यक अनुसन्धान गरी संलग्न व्यक्तिहरूलाई कानुनी कारबाहीको दायरामा ल्याउन निर्देशन दिनुभएको हो।
सरकारले एनओसी बिना विदेश जान खोज्ने गतिविधिलाई मानव तस्करीको सम्भावित रूप मानेर कडाइका साथ निगरानी गर्न थालेको छ। हाल घटनाको विस्तृत अनुसन्धान भईरहेको छ र दोषी पहिचान भएमा कडा कारबाही गरिने स्पष्ट गरिएको छ।
विदेश जाने प्रक्रियामा पारदर्शिता र कानुनी प्रक्रिया सुनिश्चित गर्न गृह मन्त्रालयले पुनः सतर्कता अपनाउन सबैलाई आग्रह गरेको छ।
लाइभदाङ । १० श्रावण २०८२, शुक्रबार १०:२७ बजे