दाङ, ६ माघ ।
नेकपा एमालेले दाङ निर्वाचन क्षेत्र नम्बर १ मा रेवतीरमण शर्मा घिमिरेलाई प्रतिनिधिसभा सदस्यका लागि उम्मेदवार बनाएको छ। फागुन २१ गते हुने प्रतिनिधिसभा निर्वाचनका लागि एमालेको तर्फबाट घिमिरेले टिकट प्राप्त गरेका हुन्।
आज उम्मेदवारहरूको मनोनयन दर्ता हुँदैछ। यसअघि घिमिरे लुम्बिनी प्रदेशसभा सदस्यका रूपमा निर्वाचित भएका थिए। उनी दाङ क्षेत्र नम्बर १ ९२० बाट २०७४ सालको निर्वाचनमा प्रदेशसभा सदस्यमा निर्वाचित भएका हुन्।
को हुन रेवतीरमण शर्मा घिमिरे ?
रेवतीरमण शर्मा घिमिरे २०३५ सालमा अखिल विभाजनसँगै अखिल छैटौँमा आबद्ध भएका थिए। २०३९ सालमा उनले त्रिभुवन विश्वविद्यालयबाट अर्थशास्त्रमा स्नातकोत्तर उपाधि प्राप्त गरेका छन्।
२०६२–०६३ सालको जनआन्दोलनमा दाङको नेतृत्व घिमिरेले गरेका थिए। उनी २०५९ देखि २०६२ सालसम्म तत्कालीन नेकपा एमालेको जिल्ला सचिवको जिम्मेवारीमा रहेका थिए। २०७४ सालको निर्वाचनमा दाङ क्षेत्र नम्बर १ (२) बाट टिकट पाएर उनी भारी मतका साथ प्रदेशसभा सदस्यमा निर्वाचित भएका थिए।
उनको जीवनशैली सरल, सन्तुलित र अहंकारविहीन रहेको बताइन्छ। यही कारण उनलाई नजिकबाट चिन्नेहरूले ‘नेतृत्वभन्दा भरोसा’ का रूपमा बुझ्ने गर्छन्।
सुरक्षित शैक्षिक पेशा त्यागेर कम्युनिस्ट आन्दोलन रोज्नु उनका लागि जोखिमपूर्ण तर ऐतिहासिक निर्णय थियो। त्यो सुविधा खोज्नेहरूको बाटो नभई विचार र प्रतिबद्धताले भरिएको कठिन यात्रा थियो। यही यात्राले उनलाई लोभ, लालच र सत्तामुखी राजनीतिबाट टाढा राखेको देखिन्छ।
राजनीतिमा चमकभन्दा चरित्र दीर्घकालीन हुन्छ भन्ने उदाहरणका रूपमा घिमिरेलाई लिइन्छ। हाल उनी पार्टीभित्र केन्द्रीय लेखा आयोग सदस्यको जिम्मेवारीमा रहेका छन्।
लाइभदाङ । ७ माघ २०८२, मंगलवार १०:२८ बजे