तुलसीपुर खानेपानी उपभोक्ता तथा सरसफाई संस्थामा यस क्षेत्रमा क्रियाशिल सबै राजनीतिक दलहरु एकजुट भएका छन् । यस पटक सबै राजनीतिक दलहरुले एक/एक जनाको दरले भागबन्डा गरेर सहमति कायम गरे । यसले सामाजिक संघसंस्थामा देखिएको एकताको सबैतिर प्रशंसा भयो । सामाजिक संघसंस्थाहरुमा राजनीतिक लडाई हुँदा त्यसले दीगो रुपमा प्रभाब पारेका इतिहास छन् । एक दलले जित्दा, अर्को दलले सहयोग नगर्ने प्रबृति हावी थियो । दलहरुले सामाजिक संघसंस्थाको नेतृत्वकालागि चरम राजनीति गर्ने र एक पक्षले गरिरहेका कामको अर्को पक्षले अवरोध पु¥याउने प्रबृतिले हरेक क्षेत्रको विकासमा बाधा पुगेको थियो । तर, सबै राजनीतिक दलहरुको सहभागितामा भएको यो कार्यले खानेपानी संस्थाको विकासमा टेवा पुग्नेछ ।
खानेपानी भनेको संवेदनशील क्षेत्र पनि हो । यो भनेको हरेक प्राणीकालागि नभई नहुँने कुरा भएकाले पनि जनताले बढि चुस्त र सहजता खोज्ने गर्छन् । त्यो सहजताकालागि सक्षम र सबल नेतृत्व चाहिन्छ । सक्षम नेतृत्वकालागि सबैको सहयोग चाहिन्छ । सबैको सहयोग भएमा मात्रै नेतृत्व सफल हुने कुरा हो । अहिले जुन हिसाबले सहमति भएको छ, यसले आउने नेतृत्वकालागि काम गर्न निकै सहज बनाउछ । सबै राजनीतिक दलहरुले अपनत्व महशुस गर्नेछन् । सबै राजनीतिक दलहरुले आफूले जितेको अनुभूति गर्नेछन्, र खानेपानीको विकासकालागि सबैबाट सहयोग हुनेछ ।
अझै पनि तुलसीपुरमा खानेपानीको समस्या नै छ । घरमा धारा जडान भएका छैनन् । धारा जडानमा पनि राजनीतिक प्र्रभाब हुने स्थिति थियो । मुहान संरक्षण गर्ने उतिकै चुनौति छ । पटक–पटक तुलसीपुर खानेपानीको मुहान क्षेत्रमा चुनढुंगा उत्खनन् गर्ने गरि गोप्य रुपमा प्रक्रिया अघि बढाएकोजस्ता कुराहरु आउछन्, अबको नेतृत्वले यसमा गम्भीर भएर ध्यान दिनेछ । सामाजिक संघसंस्थामा राजनीति भन्दा जनताको सेवामा बढि केन्द्रित हुनेछ, भन्ने सञ्देश दिनेछ । ९ राजनीतिक दलको सहमितको मर्म र सन्देश पनि त्यही हो । खानेपानी मात्रै होईन्, अब सबै क्षेत्रमा राजनीतिक प्रतिष्पर्धा भन्दा पनि राजनीतिक सहमति कायम गरेर अगाडी बढ्ने र सबैको अपनत्व हुनेगरि काम गर्न सकियो भने त्यसले यहाँका राजनीतिक दलको अभ्यासको चौतर्फी प्रशंसा हुनेछ, भने विकासले पनि फड्को मार्नेछ । यसतर्फ ध्यान दिन आबश्यक छ । साभार : अग्रिम साप्ताहिक
लाइभदाङ । १३ पुष २०७८, मंगलवार २१:०८ बजे