तुलसीपुर, २७ कात्तिक । दाङको तुलसीपुर उपमहानगरपालिका वडा नं. ४ ले वडाध्यक्ष कप खेलकूद प्रतियोगिताको आयोजना गरेको छ ।
यही कात्तिक २९ देखि मंसिर १ गतेसम्म खाद्रे खेल मैदानमा प्रतियोगिता हुने वडाध्यक्ष तुलसी थापा मगरले बताए । उनका अनुसार सामुदायिक बन स्तरीय फुटबल प्रतियोगिता, रस्साकस्सी प्रतियोगिता, टोल विकास संस्था स्तरीय भाले छोपाई, महिला स्वास्थ्य स्वयंसेविका स्तरीय कुर्सी दौड तथा आमा समूह स्तरीय घैटाफोर प्रतियोगिता हुन लागेको हो ।
फुटबल खेलको २९ कात्तिकको विहान १० बजेसम्म नाम दर्ता गर्न सकिने छ । साथै एउटा सामुदायिक बनबाट खेलाडी नपुग्ने अबस्था भएमा दुई वटा सामुदायिक बनबाट एउटै टिम बनाउन सकिने समेत ब्यबस्था गरिएको छ ।
खेलको उद्घाटन उपमहानगरपालिकाका प्रमुख टिकाराम खड्काले गर्नेछन् । वडाको खेल क्षेत्रको विकासकालागि प्रतियोगिता आयोजना गरिएको वडाध्यक्ष थापाले बताए ।
लाइभदाङ । २७ कार्तिक २०८१, मंगलवार २१:३३ बजे