तुलसीपुर, ३ कार्तिक ।
तुलसीपुरमा जारी प्रथम तुलसीपुर लोक नृत्य तथा लोक दोहोरी प्रतियोगितामा आज पनि राष्ट्रिय तथा स्थानीय कलाकारको प्रस्तुती रहने भएको छ । प्रतियोगितामा आज पनि चर्चित लोक गायक रामजी खाँड, गायिका विष्णु शेपाईली, डान्सर गोमा रिजाल र विपना परियारको बेजोड प्रस्तुती रहने भएको छ ।
प्रतियोगितासंगै सास्कृतिक कार्यक्रममा दैनिकजसो राष्ट्रिय तथा स्थानीय कलाकारको प्रस्तुती रहने गरेको आयोजक मितेरी युवा क्लबका अध्यक्ष अजय बुढाथोकीले जानकारी दिनुभयो ।
असोज २८ गते शुक्रबारदेखि जारी प्रतियोगितामा राष्ट्रिय तथा स्थानीय कलाकारले प्रस्तुती राखिरहेका छन् । मेलामा दिनप्रतिदिन दर्शकको संख्या बढ्दै गएको छ । मेलामा लोक नृत्य प्रतियोगिताको लागि अडिसन पनि संचालन भइरहेको छ ।
स्थानीय कला संस्कृतिका संरक्षण गरी नवप्रतिभाको उजागर गर्ने उद्देश्यका साथ शुक्रबारदेखि संचालन भएको मेला कार्तिक ११ गतेसम्म संचालन हुनेछ ।
प्रतियोगितामा भाग लिन अब एक दिनमात्र बाँकी रहेको संयोजक बुढाथोकीले बताउनुभयो । नृत्य प्रतियोगिताका लागि असोज ४ गतेसम्म भाग लिन सकिने उहाँले बताउनुभयो ।
प्रथम हुनेले १ लाख, द्वितीय हुनेले ५० हजार र तृतीय हुनेले २५ हजार पुरस्कार प्राप्त गर्ने उहाँले बताउनुभयो । तुलसीपुर उपमहानगरपालिका वडा नम्बर ५ को पातुखोला पुलको उत्तरतर्फ मेला संचालन भइरहेको छ ।
लाइभदाङ । ३ कार्तिक २०७९, बिहीबार ११:३१ बजे