दाङको तुलसीपुर उपमहानगरपालिकाले अस्थायी क्रसर उद्योग अनुमति दिने विषयमा छलफल अगाडी बढाएपछि यस विषयमा बहस सुरु भएको छ । तुलसीपुर १२ स्थित ग्वारखोलाबाट जसपुर क्षेत्रमा सिंचाई गर्नकालागि करोडौंको लगानीमा नहर निर्माण हुन लागेको छ । त्यो नहर निर्माणकालागि आबश्यक सामग्री उत्पादन आफ्नै क्रसरले गर्ने गरि ठेकेदार कम्पनीले माग गरेपछि अस्थायी क्रसर उद्योग सञ्चालनको अनुमति दिने वा नदिने भन्ने विषयमा कार्यपालिकामा बहस भइरहेको छ । यो सन्दर्भमा कार्यपालिका सदस्यहरु पनि दुई धार भएका छन् । एक पक्ष अनुमति नदिने भन्छ, भने अर्को पक्ष अनुमति दिनपर्ने विषयमा लबिङ गरिरहेको छ ।

यस अघि पनि अस्थायी क्रसर उद्योग सञ्चालनको अनुमति लिएर स्थायी रुपमै चलाइरहेका उदाहरणहरु रहेकाले पनि यो विषय बढि पेचिलो बन्ने गरेको छ । अस्थायी भनेर अनुमति लिने र स्थायी रुपमा क्रसर चलाउने गर्ने गरेका छन् । यसले गर्दा पनि शंकाको विषय बनेको छ । सत्ता र शक्तिको आडमा यसरी नागरिकको भावना अनुसार कामहरु भइरहेकाले पनि यो विषय पेचिलो हुनु स्वभाविकै पनि हो । यसमा उपमहानगरपालिकाले पनि आफ्नो नाफा÷घाटा पनि हेरिरहेको छ । क्रसर चलाउदा आफूहरुलाई त्यसले कति सामग्रीहरु उपलब्ध गराउने, अन्य सुविधाहरु उपमहानगरपालिकाले के–के दिने भन्ने विषयको पनि बहस हुने गरेको छ । यदि अस्थायी क्रसर उद्योग अनुमति दिने तर, त्यसले उपमहानगरपालिकालाई केही पनि फाईदा नहुँने अबस्था रहेमा त्यसको औचित्य नरहने विषयमा पनि बहसहरु भइरहेका छन् ।

विकास निर्माणकालागि क्रसर उद्योग सञ्चालन दिनु पर्छ नै । किनकी ठूला–ठूला योजनाहरुकालागि सामग्रीहरु बाहिरबाट ल्याएर सम्भव हुँदैन । तर, राज्यले नै अहिले स्थायी क्रसर उद्योगहरु सञ्चालनको अनुमति सहजै नदिइरहेको अबस्था छ । अहिले सञ्चालनमा रहेका क्रसर उद्योगहरु पनि मापदण्ड अनुसार चल्न सकिरहेका छैनन । सरकारले पटक–पटक नियमन गर्न खोज्छ, तर पछि हटिरहन्छ । क्रसर व्यबसायीहरुको हालिमुहाली छ । सरकार परिबर्तन गर्नेसम्मको हात क्रसर मालिकहरुले राख्ने गरेका सामाचारहरु बाहिर आउछन्। बालुवा धुने उद्योगका रुपमा अनुमति लिने र क्रसर उद्योग नै चलाईरहेका छन्, त्यसमा पनि राजनीतिक दलका नेताहरु नै सहभागि रहेर यसरी अबैद्य धन्दा चलिरहेको अबस्थामा उपमहानगरपालिकाले अस्थायी अनुमति दिने र अबैद्य रुपमा स्थायी बनाएर चलाउने हो की भन्ने प्रश्न उठ्ने गरेको छ । अस्थायी क्रसर अनुमति दिदा नागरिकको जीवन, जलवायुलगायतमा असर नपर्ने गरि दिने र कति समयकालागि, के प्रायोजनकालागि दिने हो भन्ने कुरा प्रष्ट खुलाएर दिनुपर्छ ।र, निर्माणको काम सकिएमा तत्काल क्रसर बन्द गर्नतर्फ लाग्नुपर्छ । अन्यथा शक्ति र सत्ताको आडमा त्यहीबाट अबैद्य धन्दा सुरुवात नहोला भन्न सकिदैन । साभार: अग्रिम साप्ताहिक