रुकुम पश्चिम, १ पुस ।
रुकुम पश्चिमको बाँफिकोट गाउँपालिका वडा नम्बर २ कुनाखेतमा एक पुरुष मृत भेटिएका छन् । परम्परागत रुपमा लाग्दै आएको कुनाखेत मेला हेर्न गएका रुकुम पूर्वको पुथाउत्तरगंगा गाउँपालिका वडा नम्बर ५ का ४७ वर्षिय लिलाबहादुर घर्ती सोमबार दिउँसो मृत भेटएका हुन ।
कुनाखेत मेला लाग्ने स्थानदेखि नजिकै सानीभेरी नदि किनारामा घर्तीको शव फेला परेको जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक ऋषि पाठकले जानकारी दिनुभयो ।
कुनाखेतमा बिहिबारदेखि संचालन भएको मेला आज सकिँदै छ । सोही मेला हेर्न गएका घर्तीको सोमबार दिउँसो शव फेला परेको हो । शव फेला पश्चात जिल्ला प्रहरी कार्यालयबाट प्रहरी निरीक्षक पाठक सहितको प्रहरी टोली घटनास्थल पुगेर अनुसन्धान गरिरहेको छ ।
घर्तीको शव कुनाखेत नजिकै सानीभेरी नदि किनाराको भिरालो ठाउँमा भेटिएको थियो । घटनाको बारेमा अनुसन्धान भइरहेकाले अनुसान्धान पछि थप खुल्ने प्रहरी निरीक्षक पाठकले जानकारी दिनुभयो ।
लाइभदाङ । १ पुष २०८१, सोमबार १९:०३ बजे