दाङ
११ भदौ / नेकपा एमाले दाङले राप्ती प्रादेशिक अस्पताल तुलसीपुरका निमित्त मेडिकल सुपरिटेन्डेन्ड डा. विनोद सिंहमाथि कालो मासो दल्ने दुईजनालाई साधारण सदस्य समेत नरहने गरि कारवाही गरेको छ ।
आज दिउसो पौने २ बजेतिर डा. सिंह माथि कालोमासो दल्ने एमाले निकट अनेरास्ववियुका जिल्ला संयोजक सर्जन परियार र सहसंयोजक दिवस क्षेत्रीलाई कारवाही गरिएको हो ।
एमाले दाङका अध्यक्ष हुकुमबहादुर बस्नेत र सचिब मनोहर बुढाथोकीले एक विज्ञप्ति जारी गरि डा. सिंह माथि दुव्र्यबहार गर्ने कालोमोसो दल्ने र कानुन हातमा लिने गरेका कार्यप्रति निन्दा समेत गरेका छन् । साथै कानुन वमोजिम कारवाहीको माग समेत गरेका छन् ।
संयोजक परियारकी श्रीमतीलाई टाईफाईडको उपचारकालागि विहीबार प्रादेशिक अस्पतालमा लगिएको र अस्पतालमा कल्चर चेकजाँचको सेवा नभएपछि मेसु सिंहसंग विवाद सिर्जना भएको थियो । त्यसपछि आज ४/५ जना युवाहरुले कार्यकक्षमै आएर मोसो दलेर भागेका थिए । डा.सिंहले अस्पतालमा कल्चर सेवा नै नभएकाले त्यो सेवा प्रदान गर्न नसकिने बताएका थिए ।
लाइभदाङ । ११ भाद्र २०७८, शुक्रबार २०:१३ बजे