ओमप्रकाश गुप्ता
दाङ २४ साउन । दाङको दुधरासमा दुई वटा मोटरसाइकल एकआपसमा ठोक्किँदा १ जनाको मृत्यु भएको छ भने २ जना घाइते भएका छन् ।
शनिबार बेलुकी साढे ७ बजेको समयमा तुलसीपुरबाट घोराही तर्फ जाँदै गरेको लु प्र ०२–००१ प ११२१ नम्बरको मोटरसाइकल र विपरीत दिशाबाट आउँदै गरेको लु ३४ प ५४०६ नम्बरको मोटरसाइकल एक आपसमा ठोक्किँदा तुलसीपुर–१८ दुधरासमा दुर्घटना भएको प्रहरीले बताएको छ ।
दुर्घटनामा परि लु ३४ प ५४०६ नम्बरको मोटरसाइकल चालक राप्ती गाउँपालिका–५ लठ्ठहवाका ४६ वर्षका देवराज चौधरीको मृत्यु भएको छ । मृतक चौधरीको दाहिने खुट्टा फ्याक्चर भएको र टाउकोमा गहिरो चोट लागेको थियो । घाइते चौधरीको राप्ती प्रादेशिक अस्पताल तुलसीपुरमा उपचारका क्रममा साढे ९ बजेको समयमा मृत्यु भएको जिल्ला प्रहरी कार्यालय दाङले जानकारी दिएको छ । त्यस्तै दुर्घटनामा परि प्र.०२–००१ प ११२१ मोटरसाइकल चालक तुलसीपुर उपमहानगरपालिका–५ का २७ वर्षका नवराज पौडेल घाइते भएका छन् । उनको दुवै हात खुट्टा, टाउको र छातीमा चोट लागेको र अवस्था मध्यम रहेको प्रहरीले बताएको छ ।
यस्तै सोही मोटरसाइकलमा पछाडि सवार बारा विश्रामपुर गाउँपालिका–२ घर भई हाल तुलसीपुर–५ मा बस्ने १८ वर्षका रोशन पण्डित पनि घाइते भएका छन् । उनको दुवै हातखुट्टा,टाउको र मुखमा चोट लागेको छ । घाइते दुवै जनाको राप्ती प्रादेशिक अस्पताल तुलसीपुरमा उपचार भइरहेको प्रहरीले जनाएको छ । दुवै सवारी साधन अस्थाइ प्रहरी पोष्ट बेलझुण्डीको नियन्त्रणमा रहेको छ । घटना बारे थप अनुसन्धान भइरहेको प्रहरीले जनाएको छ ।
लाइभदाङ । २६ श्रावण २०८२, आईतवार ०७:०४ बजे