तुल बहादुर कवँर मगर
मसुरीया,२५ बैशाख ।
राप्ती गाउँपालिका दाङका अध्यक्ष प्रकाश विष्टले इलाका प्रहरी कार्यालय भालुवाङमा हालै सरूवा भई आउनुभएका प्रहरी निरीक्षक पुस्करसिंह ऐरीलाई स्वागत गर्नुभएको छ।
बुधवार गाउँपालिकाको कार्यालयमा आयोजित कार्यक्रममा उहाँले ऐरीको आगमनले गाउँपालिकाको शान्ति सुरक्षा थप सुदृढ हुने विश्वास व्यक्त गर्नुभयो।
अध्यक्ष विष्टले भन्नुभयो, “प्रहरी संगठन राष्ट्र र जनताको सुरक्षाको आधारस्तम्भ हो। प्रहरी जनतामैत्री, पारदर्शी र प्रभावकारी सेवा प्रवाहमा उदाहरणीय बन्नुपर्छ।” उहाँले कानूनको कडाइका साथ पालना गर्न आग्रह गर्दै मानवीय संवेदनालाई कहिल्यै नबिर्सन सुझाव दिनुभयो।
“जनताको विश्वास जित्ने व्यवहार गर्नुहोस्,” उहाँले भन्नुभयो, “प्रहरी जनताको साथी हो भन्ने अनुभूति सबैमा हुनुपर्छ।” महिला, बालबालिका, वृद्धवृद्धाको सुरक्षामा अझ चनाखो हुनुपर्नेमा अध्यक्ष विष्टले जोड दिनुभयो। उहाँले प्रहरी र पालिकाबीचको सहकार्यलाई अझ मजबुत बनाउँदै समृद्ध र सुरक्षित राप्ती निर्माणमा हातेमालो गर्ने प्रतिबद्धता व्यक्त गर्नुभयो।
कार्यक्रममा उहाँले निरीक्षक ऐरीलाई सफल कार्यकालको शुभकामना पनि दिनुभयो। स्वागतपछि प्रहरी निरीक्षक ऐरीले आफू समुदायसँग मिलेर काम गर्ने प्रतिबद्धता जनाउनुभयो।
उहाँले स्थानीय तहसँग सहकार्य गर्दै शान्ति सुरक्षालाई मजबुत बनाउने लक्ष्यका साथ अघि बढ्ने बताउनुभयो। कार्यक्रममा पालिका पदाधिकारी, कर्मचारी, सुरक्षाकर्मी तथा सर्वसाधारणको उपस्थिति रहेको थियो।
लाइभदाङ । २५ बैशाख २०८२, बिहीबार २१:१५ बजे