तुलसीपुर, ८ माघ ।
दाङको तुलसीपुर–३ मा सञ्चालन भएको तेस्रो वडाअध्यक्ष कप फुटबल प्रतियोगिता २०८१ को उपाधी रोयल रानागाँउ (बि) ले जितेको छ । वडा नम्बर ३ को आयोजनामा माघ ३ गतेदेखि सुकिदह खेल मैदान रानागाउँमा भएको वडाअध्यक्ष कप फुटबल प्रतियोगितामा प्रथम भएको रोयल रानागाउँ (बि) ले नगद ४० हजारसहित कप, मेडल र प्रमाणपत्र प्राप्त गरेको छ ।
यस्तै दोस्रो स्थान हासिल गरेको सुनौलो बिहानी युवा क्लबले २५ हजार कप, मेडल र प्रमाणपत्र प्राप्त गरेको छ भने तृतिय हुने टाइगर युवा क्लबले १५ हजारसहित कप, मेडल र प्रमाणपत्र हात पारेको छ ।
माघ ३ गतेदेखि सुरु भएको तेस्रो वडाअध्यक्ष कप फुटबल प्रतियोगिताको आज लुम्बिनी प्रदेश खेलखुद विकास समितिका सदस्य सचिव तिरण गौतमको प्रमुख आथित्यतामा समापन गरिएको हो । सो अवसरमा बोल्दै सदस्य सचिव गौतमले वडा नम्बर ३ मा रहेको शुकिदह खेल मैदानलाई विस्तार गर्न आवश्यक रहेको बताउनुभयो ।
सो अवसरमा खेल प्रतियोगिता उद्घाटनको क्रममा विभिन्न नाँचहरु प्रस्तुत गरेर सहयोग गर्ने आमा समुहहरुलाई सम्मान गरिएको थियो । तुलसीपुर–३ का वडाअध्यक्षको अध्यक्ष्यतामा भएको समापन कार्यक्रमको सहजीकरण वडा सदस्य राजेन्द्र कुमार गुरुङले गर्नुभएको थियो ।
लाइभदाङ । ८ माघ २०८१, मंगलवार १९:५७ बजे