दाङ, १२ असोज । दाङमा कुसुण्डा जातिको भाषा संरक्षण गर्न समिति गठन गरिएको छ ।

राष्ट्रिय आदिवासी जनजाति महिला महासङ्घको समन्वयमा कुसुण्डा महिला विकास समाज, नेपालले आयोजना गरेको कार्यक्रममा समिति गठन गरिएको हो । फनी कुसुण्डाको संयोजकत्वमा १५ सदस्यीय समिति गठन गरिएको छ । समितिले कुसुन्डा भाषाको संरक्षणका साथै सो समुदायका महिलालाई अधिकार दिलाउनका लागि पहल गर्ने जनाएको छ ।

लोपोन्मुख कुसुण्डा समुदायका महिलालाई नेतृत्व तहमा अघि बढाउने लक्ष्यका साथ काम गरिरहेको राष्ट्रिय आदिवासी जनजाति महिला महासङ्घका सचिव सावित्रा चेपाङले बताउनुभयो । “कुसुण्डा समुदायका महिलाको पहुँच बढाउन जरुरी छ”, उहाँले भन्नुभयो । कुसुण्डा समुदायमा नयाँ पुस्ताको ध्यान आफ्नो भाषा संरक्षणतर्फ केन्द्रीत भएको पाइएको छ ।

स्थानीय तहमा लागू गर्नसके भाषा संरक्षणमा टेवा पुग्ने कक्षा १० मा अध्ययनरत फाली कुसुन्डा बताउनुहुन्छ । कार्यक्रममा १८ कुसुण्डा किशोरीको सहभागिता थियो ।