दाङ, ०५ असोज ।
घोराही उपमहानगरपालिका–७, सौडियारस्थित श्री माध्यमिक विद्यालयमा निवर्तमान निमित्त प्रधानाध्यापक नन्दबहादुर ओली र निवर्तमान सहायक प्रधानाध्यापक दामोदर पाण्डेलाई सम्मानसहित बिदाइ गरिएको छ भने नवनियुक्त निमित्त प्रधानाध्यापक हिरालाल न्यौपाने र सहायक प्रधानाध्यापक नरेश पौडेललाई स्वागत गरिएको छ।

विद्यालय व्यवस्थापन समिति (विव्यस) अध्यक्ष ईश्वरी बुढाको अध्यक्षता तथा निवर्तमान विव्यस अध्यक्ष निशानदाजु भट्टराईको प्रमुख आतिथ्यतामा सम्पन्न कार्यक्रममा घोराही–७ का वडा अध्यक्ष खोपिराम चौधरीको विशिष्ट आतिथ्यता रहेको थियो।

कार्यक्रमका प्रमुख अतिथि भट्टराईले नवनियुक्त निमित्त प्रधानाध्यापक हिरालाल न्यौपाने र सहायक प्रधानाध्यापक नरेश पौडेललाई बधाई तथा सफल कार्यकालको शुभकामना व्यक्त गर्नुभयो। उहाँले विद्यालयको नेतृत्व परिवर्तनलाई नयाँ सोच, ऊर्जा र जिम्मेवारीका साथ अघि बढ्ने अवसरका रूपमा लिनुपर्ने बताउँदै विद्यालयको शैक्षिक गुणस्तर अभिवृद्धि, विद्यार्थीको सिकाइ उपलब्धि सुधार तथा अभिभावक र समुदायसँगको सम्बन्धलाई थप मजबुत बनाउन नयाँ नेतृत्वले महत्वपूर्ण भूमिका निर्वाह गर्ने विश्वास व्यक्त गर्नुभयो।

उहाँले निवर्तमान निमित्त प्रधानाध्यापक नन्दबहादुर ओली र सहायक प्रधानाध्यापक दामोदर पाण्डेले विद्यालयको शैक्षिक तथा प्रशासनिक क्षेत्रमा पुर्‍याएको योगदानको प्रशंसा गर्दै उहाँहरूको अनुभव र योगदान विद्यालयका लागि महत्वपूर्ण सम्पत्ति भएको बताउनुभयो। सो अवसरमा प्रमुख अतिथि भट्टराईले निवर्तमान निमित्त प्रधानाध्यापक ओली र सहायक प्रधानाध्यापक पाण्डेलाई मायाको चिनोसहित सम्मान गरी पदबाट बिदाइ गर्नुभयो।

कार्यक्रममा पूर्व विव्यस अध्यक्षहरूले पनि विद्यालयको नेतृत्व परिवर्तन तथा निवर्तमान नेतृत्वको योगदानबारे धारणा राख्नुभएको थियो। पूर्व विव्यस अध्यक्ष शरद केसीले विद्यालयको विकासमा प्रधानाध्यापक तथा शिक्षक नेतृत्वको भूमिका महत्वपूर्ण हुने बताउँदै नयाँ नेतृत्वले विगतका सकारात्मक अभ्यासलाई निरन्तरता दिँदै थप प्रभावकारी काम गर्नुपर्ने धारणा राख्नुभयो।

त्यस्तै, पूर्व विव्यस अध्यक्ष कुमारसिंह पुनले विद्यालयको शैक्षिक उन्नयनका लागि व्यवस्थापन समिति, शिक्षक, अभिभावक र समुदायबीचको सहकार्य आवश्यक रहेको बताउनुभयो। उहाँले निवर्तमान नेतृत्वले निर्वाह गरेको जिम्मेवारीको सम्मान गर्दै नयाँ नेतृत्वलाई सफलताको शुभकामना व्यक्त गर्नुभयो।

पूर्व विव्यस अध्यक्ष नन्दराम भण्डारीले विद्यालयको विकास निरन्तर चलिरहने प्रक्रिया भएकाले नेतृत्व परिवर्तनसँगै विद्यालयले नयाँ गति लिनुपर्ने बताउनुभयो। उहाँले शिक्षक, विद्यार्थी, अभिभावक तथा समुदायको सामूहिक प्रयासबाट मात्रै विद्यालयलाई थप उत्कृष्ट बनाउन सकिने धारणा राख्नुभयो।

निवर्तमान निमित्त प्रधानाध्यापक नन्दबहादुर ओलीले आफ्नो कार्यकालमा विद्यालय सञ्चालनका क्रममा शिक्षक, कर्मचारी, विद्यार्थी, अभिभावक तथा विद्यालय व्यवस्थापन समितिबाट प्राप्त सहयोगप्रति आभार व्यक्त गर्नुभयो। उहाँले जिम्मेवारी निर्वाहका क्रममा प्राप्त अनुभवलाई महत्वपूर्ण उपलब्धिका रूपमा लिएको बताउँदै आगामी नेतृत्वले विद्यालयलाई अझ राम्रो ढंगले अघि बढाउने विश्वास व्यक्त गर्नुभयो।

निवर्तमान सहायक प्रधानाध्यापक दामोदर पाण्डेले पनि विद्यालयमा काम गर्दाको आफ्नो अनुभव सुनाउँदै विद्यालयको हित र शैक्षिक उन्नयनका लागि सबै पक्षबीच सहकार्य आवश्यक रहेको बताउनुभयो। उहाँले आफूलाई जिम्मेवारी निर्वाह गर्ने अवसर दिएकोमा विद्यालय परिवारप्रति धन्यवाद व्यक्त गर्नुभयो।

नवनियुक्त निमित्त प्रधानाध्यापक हिरालाल न्यौपानेले आफूलाई दिइएको जिम्मेवारीलाई अवसरसँगै चुनौतीका रूपमा लिएको बताउनुभयो। उहाँले विद्यालयको शैक्षिक गुणस्तर सुधार, विद्यार्थीको सिकाइ उपलब्धि वृद्धि, शिक्षकबीच सहकार्य तथा अभिभावकसँगको समन्वयलाई प्राथमिकतामा राखेर काम गर्ने प्रतिबद्धता व्यक्त गर्नुभयो।

त्यस्तै, नवनियुक्त सहायक प्रधानाध्यापक नरेश पौडेलले विद्यालयको शैक्षिक तथा प्रशासनिक जिम्मेवारीलाई इमानदारी र सक्रियताका साथ निर्वाह गर्ने बताउनुभयो। उहाँले शिक्षक, विद्यार्थी, अभिभावक र समुदायसँग सहकार्य गर्दै विद्यालयको समग्र विकासमा योगदान पुर्‍याउने प्रतिबद्धता व्यक्त गर्नुभयो।

कार्यक्रममा विद्यालयका शिक्षक, कर्मचारी, अभिभावक तथा अन्य सरोकारवालाको सहभागिता रहेको थियो। कार्यक्रम शिक्षक नारद भण्डारीको स्वागत मन्तव्यबाट सुरु भएको थियो भने शिक्षिका पदमा लम्सालले सञ्चालन गर्नुभएको थियो।

सम्मान तथा स्वागत कार्यक्रममार्फत निवर्तमान नेतृत्वको योगदानको कदर गर्दै नयाँ नेतृत्वलाई औपचारिक रूपमा जिम्मेवारीका लागि स्वागत गरिएको हो। सहभागीहरूले नेतृत्व परिवर्तनसँगै विद्यालयले थप शैक्षिक प्रगति हासिल गर्ने अपेक्षा व्यक्त गरेका थिए।