तुलसीपुर, २१ फागुन । दाङको दुई पालिकामा कपडा बैंक स्थापना गरिएको छ ।
क्लोथ एण्ड फुड बैंक नेपालले दंगीशरण गाउँपालिका र बबई गाउँपालिकामा बुधबार कपडा बैंक स्थापना गरेको हो । हुनेले दिने र नहुँनेले लिने सिद्धान्त अनुरुप कपडा बैंक स्थापना गरिएको हो ।
सोही अनुरुप पालिकाको कार्यालयहरुमा कपडा बैंक स्थापना गरिएको हो । उक्त कपडा बैंककालागि दंगीशरण गाउँपालिकाले साढे दुईलाख सहयोग गरेको छ, भने बबई गाउँपालिकाले पनि सहयोग गरेको बैंकका केन्द्रीय अध्यक्ष कमल जीसीले बताए ।“दाङमा दुबै वटा पालिकाले सहयोग गर्ने सहमति गरेर कपडा बैंक स्थापना गरेका हौं”,उनले भने “हामीले यसलाई अब नियमित सञ्चालन गर्नेछौं ।” बैंकको चाबी समेत पालिकालाई हस्तान्तरण गरिएको छ ।
अब पुराना कपडाहरु उक्त बैंकमा राख्न सकिनेछ, ति कपडाहरुलाई सफा गरेर पुनः आबश्यकता पर्नेहरुलाई हस्तान्तरण गरिने उनले बताए । साथै पालिकालाई त्यहाँका आर्थिक अबस्था कमजोर भएका परिवारहरुलाई सहयोगकालागि केही कपडा समेत हस्तान्तरण गरिएको थियो ।
उक्त संस्थाले अहिलेसम्म एकसय ६४ पालिकामा यसरी कपडा बैंक स्थापना गरेको छ, भने एक लाख बढिलाई कपडा हस्तान्तरण गरेको छ । अहिलेपनि समाजमा गरिबी रहेको भन्दै जाडोमा न्यानो कपडा नहुँदा कठ्याङ्ग्रीदो अबस्थालाई अन्त्य गर्न कपडा बैंक सहयोगी हुने दंगीशरण गाउँपालिकाका अध्यक्ष शम्भु गिरीले बताए ।
समाजमा बर्ग अन्त्य गर्न यस्ता कपडा बैंकले भूमिका खेल्ने बबई गाउँपालिका अध्यक्ष कुलबहादुर खत्री क्षेत्रीले बताए । उनले यस्ता कार्यले समाजमा सकारात्मक सन्देश दिने समेत बताए ।
कार्यक्रममा दंगीशरण गाउँपालिकाका उपाध्यक्ष पीमा कुमारी खड्का, बबई गाउँपालिकाका उपाध्यक्ष बम कुमारी खड्का, दंगीशरण गाउँपालिकाका प्रमुख प्रशासकीय अधिकृत कर्णबहादुर नेपाली, बबई गाउँपालिकाका प्रमुख प्रशासकीय अधिकृत चेत नारायण कडेँल, प्रेस सेन्टर दाङका सचिब दिपक बोहरालगायतले समाज रुपान्तरणकालागि यसले खेल्ने भूमिका महत्वपूर्ण हुने बताएका थिए । कार्यक्रमको सहजीकरण पत्रकार सागर सुवेदीले गरेका थिए ।
लाइभदाङ । २१ फाल्गुन २०८१, बुधबार २३:०१ बजे