तुलसीपुर, २४ असोज ।
दाङको तुलसीपुरमा श्रीमानले खुर्पा प्रहार गरी श्रीमतीलाई गम्भीर घाइते बनाएका छन्। तुलसीपुर–१३ दमार गाउँमा ४० वर्षीय निरा बादीलाई उनका श्रीमान राजकुमारले आक्रमण गरेको इलाका प्रहरी कार्यालय तुलसीपुरका सूचना अधिकारी तथा प्रहरी निरीक्षक प्रकाश थापाले बताए।
८/१० दिन अगाडि श्रीमान श्रीमतीबीच घरायसी विवाद हुँदा निरा तुलसीपुर–१३, बखरियास्थित माइती घरमा गएर बस्दै आएको र असोज २२ गते उनका श्रीमान ५२ वर्षीय राजकुमार बादी श्रीमतीलाई लिने भनेर माइती घरमा गएको अवस्था पुनः दुई जनाबीच वादविवाद भएको प्रहरीले जनाएको छ।
सोही क्रममा राजकुमारले घाँस काट्न प्रयोग गरिने खुर्पाले प्रहार गर्दा श्रीमती निराको घाँटी, हात र मुखमा गहिरो चोट लागेको र उनी गम्भीर घाइते भएको प्रहरीले जनाएको छ। गम्भीर घाइते उनलाई राप्ती प्रादेशिक अस्पताल तुलसीपुरमा प्रारम्भिक उपचारपछि थप उपचारका लागि नेपालगन्ज रिफर गरिएको छ।
श्रीमतीमाथि प्रहार गरेको खुर्पा राजकुमार आफ्नै टाउकोमा समेत प्रहार गर्दा गहिरो चोट लागेको र उनको राप्ती प्रादेशिक अस्पतालमा उपचार भइरहेको प्रहरीले जनाएको छ।
लाइभदाङ । २४ आश्विन २०८१, बिहीबार २२:११ बजे