प्रिया स्मृती गजमेर,
लमही, २२ भदौ ।
लमही नगरपालिकाका कार्यबाहक नगर प्रमुख लक्ष्मी योगीले स्वास्थ्य क्षेत्रमा तनमन लगाएर सेवा दिन स्वास्थ्यकर्मीलाई आग्रह गरिन ।

लमही नगरपालिकाको स्वास्थ्य शाखाले आयोजना गरेको समिक्षा कार्यक्रममा बोल्दै कार्यबाहक नगर प्रमुख योगीले भनिन “स्वास्थ्यकर्मी भनेका भगवानको दोस्रो रुप हो, स्वास्थ्यकर्मीको व्यवहारले बिरामीको आधा दुखाई कम हुने गर्छ, बिरामीसंग नम्र, र मिजासिलो भएर बोल्ने गर्नु होला, बिरामीलाई उपचार गर्दा कुनै कुराको कमि नहुनेगरी काम गर्नु होला तपाईहरुको कामको मूल्याकंन लमही नगरपालिकाले गर्छ।”

त्यस्तै लमही नगरपालिकाका प्रमुख प्रशासकीय अधिकृत देवेन्द्र प्रसाद श्रेष्ठले स्वास्थ्य भनेको अति संवेदनशिल क्षेत्र भएकोले अनुमानका आधारमा तथ्यांक जुटाउन र सेवा दिन नहुने बताए ।

“लमही नगरपालिकाको मातहतमा रहेका स्वास्थ्य संस्थामा कार्यरत स्वास्थ्यकर्मीलाई सेवामुखी भएर सेवा दिन अनुरोध गरेका छन । सत्य तथ्यमा आधारित रहेर सुचना संकलन गर्ने र सोही अनुरुपको सेवा दिनु पर्छ” श्रेष्ठले भने ।

वार्षिक समिक्षा कार्यक्रम सम्पन्न
लमही नगरपालिकाको स्वास्थ्य शाखाले नगरभित्र रहेका स्वास्थ्य संस्थाहरुको आर्थिक वर्ष २०७९/८० को वार्षिक समिक्षा गरेको छ । बिहिवार र शुक्रवार भएको कार्यक्रममा लक्ष्य, प्रगती, स्वास्थ्य समस्या जस्ता कामको समिक्षा भएको हो ।

लमही नगरपालिका स्वास्थ्य शाखा प्रमुख नारायण प्रसाद शर्माले स्वास्थ्य संस्थाहरुको प्रगति विवरण समग्र रुपमा संतोषजनक भएको बताए । “केही कुरामा सुधार गर्नु पर्ने देखिएको छ, सम्बन्धित स्वास्थ्य केन्द्रका प्रमुखहरुलाई ती सुचकलाई पूर्णपालना गर्न निर्देशन दिइसकिएको छ” शर्माले भने ।

लमही नगरपालिकाका कार्यबाहक नगर प्रमुख लक्ष्मी योगीको अध्यक्षतामा समिक्षा शुरु भएको कार्यक्रममा स्वास्थ्य शाखा प्रमुख नारायण शर्माले स्वागत मन्तव्य राखेका थिए भने वरिष्ठ अस्पताल नर्सिङ निरीक्षक मिना शर्माले कार्यक्रमको सहजीकरण गरेकी थिइन ।

सबै वडाबाट स्वास्थ्य सेवा प्रवाह
लमही नगरपालिकामा पन्ध्र सैया क्षमता भएको एउटा अस्पताल ( लमही अस्पताल) रहेको छ । स्वास्थ्य चौकी दुईवटा ( वडा नम्बर ८ मा सतबरिया स्वास्थ्य चौकी र वडा नम्बर २ मा सोनपुर स्वास्थ्य चौकी) आठ वटा नगर स्वास्थ्य केन्द्र र एक वटा नागरिक आरोग्य सेवाकेन्द्र रहेको छन ।

लमही अस्पतालमा अहिले एमडीजिपी एक जना, दुई जना मेडिकल अधिकृतद्वारा सेवा प्रवाह भैरहेको प्रशासन प्रमुख हरि खनालले जानकारी दिए । त्यस्तै स्वास्थ्य चौकी सतबरियामा जनस्वास्थ्य निरीक्षक र सोनपुर स्वस्थ्य चौकीमा सिनियर अहेव अधिकृत मार्फत सेवा सुचारु भैहेको छ ।

लमही नगरपालिकाले स्थापना गरेका नगर स्वास्थ्य केन्द्रमा एक जना सिनियर अहेव अधिकृत, हेल्थ असिस्टेन्ट, अहेव लगायतका स्वास्थ्यकर्मीहरुले सेवा दिईरहेका छन ।